فضفضة من القلب - بريد فضفضة - كل يوم فضفضة جديدة

مشكلة , افتح , جديدة , قلبك

بسم الله الرحمن الرحيم
السلام عليكم ورحمة الله وبركاته

حبيباتي احلى ليدز في الدنيا

النهاردة لقيت باب اسمه افتح قلبك

في احد المواقع الاخبارية



الباب ده عبارة عن بريد للقراء بيعرضوا فيه مشكلاتهم اليومية



وحبيت انقل المشكلات ليكم لتعم الفايدة

وكل يوم بأمر الله هتكون معانا مشكلة جديدة



ونحاول نناقش المشكلة من وجهة نظرنا الاول

وبعد كده نقول رأي الخبيرة اللي ردت على صاحبة المشكلة

فضفضة النهاردة

أرسلت (س.ن) إلى "افتح قلبك" تقول: أنا زوجة عمرى 32 سنة، وأم لطفلين، باشتغل فى شركة كبيرة، وحياتى معقولة جدا والحمد لله، فيما عدا أنى أنا وجوزى بنختلف كتير، أحيانا بنختلف بهدوء، وأحيانا تانيه بنختلف بخناقات ودوشه كبيرة، المهم انى عادة لما باكون متخانقه معاه بيبان عليا طبعا، وكل زمايلى فى الشغل غالبا بيعرفوا من شكلى من غير حتى ما أتكلم.

من حوالى سنة بدأ زميل ليا فى المكتب يتكلم معايا أكتر من قبل كده، وبلاقيه دايما يطيب خاطرى ويحاول يضحكنى لما باكون جايه الشغل وبوزى شبرين، ماكنتش باحكى له اى حاجه فى الأول، لكن شويه بشويه لقيت نفسى بافضفض معاه عن حاجات كتير خانقانى، هو كمان كان بيحكى لى عن بيته ومراته وأولاده، مش بصيغة شكوى ولا حاجه، لكن كنا بنتكلم عن حياتنا وأسرنا بصفة عامة.

فاجئنى مرة بأنه بيتصل بيا على موبايلى فى يوم إجازة، رديت طبعا لأنى فاكراه عايز حاجه بخصوص الشغل، لكن لاقيته بيقول لى إنه مخنوق جدا ومش لاقى حد يتكلم معاه، فسألنى لو ممكن يتكلم معايا شويه، فوافقت، من باب ان احنا زمايل، ومن باب ان احنا عادة بنفضفض لبعض لما بنكون فى الشغل، تانى يوم لما شافنى سألنى إذا كان اتصاله سبب لى مشكله، فقلت له لأ، فسألنى إذا كان ممكن يكلمنى من حين لآخر على الموبايل ولا لأ، ترددت فى الرد عليه، فاعتذر بسرعة عن طلبه، وقال لى انه مش هايكررها تانى.

بعدها بكام يوم لاقيته بيتصل بيا تانى، وقال لى إنه حاول ما يتصلش زى ما وعدنى، لكن مابقاش فى حد بيرتاح معاه فى الكلام غيرى، عشان كده اتصل بيا فى الآخر.

أنا عارفه إن اتصاله بيا غلط، وموافقتى عليه برضه غلط، لكن بينى وبينك كنت بحس بأهميتى لما بيكلمنى، وبحس إن أنا مميزة وذات وضع خاص عند حد، وده إحساس افتقدته من زمان جدا، من أيام ما جوزى بطل يوصل لى أى حاجه من النوع ده.

شويه شويه المكالمات بقت شبه يوميه، كان بيكلمنى عن أى حاجة، وساعات كان بيكلمنى يقول لى انه مفيش حاجه يقولها لى غير انه كان عايز يسمع صوتى، وطبعا الكلام ده كان بيسعدنى جدا، لغاية ما فى يوم قال لى بصراحة انه بيحبنى، ومش من دلوقتى ولا من يوم ما اشتغلنا سوا، لأ من أيام الكلية، لأنه كان زميلى فى نفس الكلية، وانه كان بيفكر إنه يتقدم لى زمان، لكن أنا اتخطبت لجوزى الحالى قبل ما هو يقدر يكون جاهز لحاجه زى كده.. بصراحة أنا اتبرجلت، اتلخبطت، بقيت حاسه بكمية تأنيب ضمير وقلق وخوف غير طبيعيه، وفى نفس الوقت برضه حاسه بحاله من السعادة والفرحة والانتعاش كنت نسيتها من زمان، كل الكلام ده غلط، وخطر ومايصحش....عارفه، لكن الكلام ده هو الى حاسسنى انى لسه مرغوبة، ولسه فيا حاجات حلوه، ولسه ممكن ألفت انتباه حد وأحوز إعجابه.

رديت عليه بانى ست متجوزه، وأم، وان احنا زمايل ومش هاينفع نكون اكتر من كده، ومش معنى ان فى مشاكل بينى وبين جوزى، يبقى ممكن افكر أخونه ولو حتى بالكلام، رد عليا وقال لى انه مفكرش فيا عشان المشاكل الى بينى وبين جوزى، وانه كان بيفكر فيا من زمان زى ما قلت لك، وقال لى كمان اوعى تفتكرى ان أنا واحد طهقان وزهقان من عيشته ومن مراته فبتسلى بيكى، بالعكس قال لى ان مراته كويسه جدا، وبتحبه، وبتاخد بالها من بيتها ومن ولادها جدا، لكن هو قلبه متعلق بيا انا بالرغم من كل ده.

مش هاطول عليكى استمرينا على الوضع ده كام شهر، بنتكلم مع بعض عادى زى بقية الزملاء فى الشركه، لكن بنتكلم أكتر ولفترات اطول على الموبايل بعد الشغل، لغاية ما أنا قرفت من نفسى، وزهقت من احساسى القاتل بانى باعمل حاجه غلط، فقررت انى انهى الفيلم ده، تصدقينى لو قلت لك انى كنت خايفه اخسره وخايفه أتحرم من الاحساس الى كان بيديهولى ده؟، ايوه كنت باقدم رجل وأخر رجل عشان مش عايزه افقد الحاجه الحلوه الى بدأت تدينى معنى جديد لحياتى ، لكن لقيت ندمى وتأنيب ضميرى وخوفى من الوضع ده اقوى ، فقرت انى ابلغه ان الموضوع ده انتهى، ومفيش داعى للتليفونات تانى، والمفروض ان احنا نرجع زمايل زى الأول وبس.

وعشان اقطع عليه وعلى نفسى خط الرجعه، اتنقلت لقسم تانى من اقسام الشركه، وهنا بقى كانت المفاجاه، تخيلى لقيت واحده من زمايلنا فى القسم الجديد ده بتقول لى ان فلان _الى هو نفس الشخص_ كان بيحاول معاها قبل كده؟، وزميلتنا دى برضه متجوزه، فكان ردها انها ادتله على دماغه، وبعدها بشويه عرفت انه برضه كان بيحاول مع زميله تانيه من قسم تانى، بس دى كانت آنسه، فزنقته وقالت له لو عايزنى تعالى اتقدم لى، فطبعا خاف واترعب وسابه منها.

والأدهى من كده انى عرفت من زمايلنا (الرجاله) الى معانا فى الشغل ان موبايله واللاب توب بتوعه على طول شغالين شات مع البنات من هنا ومن هناك، تخيلي؟، وأنا الى كنت فاكراه بنى آدم وعنده قلب واحساس وبيحبنى أنا بجد!!...قمة الخيابه.

طبعا اتصدمت فيه، وفى سذاجتى وعبطى، وحمدت ربنا كتير انه انقذنى من واحد زى ده، كان ممكن يبوظ لى حياتى كلها فى غمضة عين وانا مش دريانه، انا بعتالك دلوقتى عشان سببين، الأول انه وبالرغم من موقفى الآخير معاه وتوضيحى له انى خلاص مش هاقدر أكمل، بدأ يتصل بيا تانى، أنا والله مابردش، لكن مش عارفه المفروض أعمل معاه ايه تاني؟، مش عايزه أعمل مشكله وفضيحه معاه وأواجهه بكل إلى عرفته عنه، وفى نفس الوقت مش عايزاه يفضل يضغط عليا ويتصل بيا ، عشان ماضعفش فى مره من دول وأرد ونرجع تانى للدوامه دى الى ما صدقت بدأت اخرج منها، فياريت تقولى لى أعمل ايه.

والحاجه التانيه انى عايزه اوصل رساله لكل الستات من خلال بابك، وخاصة الزوجات، ياريت نسمع ونشوف ونتعلم من بعض، لأنى كنت فاكره نفسى عاقله و(فتكه) وما يتضحكش عليا، ومع ذلك ماسلمتش من ولاد (الحلال) الى زى الانسان ده، ياريت أقدر انقذ اى واحده برسالتى، دى فعلا نيتى فياريت تساعدينى على تحقيقها.

صراحه يادودى المشكله دى موجوده كتير اوى الايام دى

وده شئ طبيعى لاى واحده ضعيفه نفسيا وليس جسميا

كل انسان لما بيلاقى قصور وشعور ضاع منه اما لما بيلاقيه من اى شخص يتمسك بيه مهما كان

او بيدور عليه هوه لان كل همه انه يلاقى الشئ اللى ناقصه

صاحبه المشكله مش لاقيه الاهتمام مش لاقيه حد يتكلم معاها ولايخفف عنها وهوه ده

اللى عملته

بس انا مبسوطه جدا لانها عارفه ان اللى بتعمله ده غلط وأنه ميصحش يصدر

من انسانه مش بس متزوجه لاء ومسلمه كمان

فده دليل قاطع انها مش وحشه من جواها

طبعا هيه بتقول ان الشخص ده مش سايبها فى حالها وحاسه انها ممكن تضعف تانى

وفى نفس الوقت هيه مش عاوزه تعمل مشاكل معاه

بس لا كده غلط الافضل انها تواجهه وتقوله انها مش هترد عليه تانى

وانه مجرد زميل فقط لاغير وكل اللى بينهم هوه الشغل

وبما انهاقالت انتقلت لقسم تانى فده الاحسن

بس لازم توقفيه عند حده او ممكن تهدديه لان لما قولتى انه حاول يتكلم

مع انسه قالتله تعالى اتقدملى واضح انه مش بيحب يتزنق ولا بيحب المشاكل

فده افضل حاجه ممكن تعمليها

ده اللى هتعمليه معاه

أما انتى ياصاحبه المشكله

أولا الدنيا متفضتش من حواليكى عشان تفتفضى مع راجل

وكمان عن مشاكلك مع زوجك كده غلط والمشاكل عمرها مابتتحل

انتى صاحبه المشكله وزوج كمان ليه يد فى المشكله اما تتكلمى مع زوجك وتحاولوا تحلوا

مشاكلكوا سوا او اى واحده بتثقى فيها

بس اناطبعا بفضل تتكلمى مع زوجك

لانك طول ماانتى ساكته هيفكر انك مش بتضايقى او انه مش فى بالك

اماالراجل اللى معاكى فى الشغل ده وكل نوعيه منه عاوزين يتولع فيهم

صح يااوشا
برافو عليكي ياحبي
وانا بقى عايزة اسألك صاحبة المشكلة
ياترى لو زوجك اتكلم في مشاكلكم الشخصية مع زميلة من زميلاته في الشغل
وبدأ يتكلم معاها ويرتاح للكلام معاها
ويحكيلها مشاكلكم
ياترى هيكون احساسك ايه ؟؟

اتقي الله
واحب ان اوجه لكي نصيحة من ذهب
تعاملي مع كل زمايلك في العمل في نطق العمل فقط
يعني ممنوع منعا باتا ايا كان السبب
ان اي حد يتصل بيكي بعد مواعيد العمل الرسمية
بمعنى اوضح
مواعيد العمل للعمل ومواعيد البيت والاسرة للبيت والاسرة
واقطعى خط الرجعه مع الارجل الحقير ده نهائي
ويكون ردك عليه رد حاااااااااااسم وقاطع
وبمنتهى الحدة

المشاركة الأصلية كتبت بواسطة داليا مودي صح يااوشا برافو عليكي ياحبي وانا بقى عايزة اسألك صاحبة المشكلة ياترى لو زوجك اتكلم في مشاكلكم الشخصية مع زميلة من زميلاته في الشغل وبدأ يتكلم معاها ويرتاح للكلام معاها ويحكيلها مشاكلكم ياترى هيكون احساسك ايه ؟؟ اتقي الله واحب ان اوجه لكي نصيحة من ذهب تعاملي مع كل زمايلك في العمل في نطق العمل فقط يعني ممنوع منعا باتا ايا كان السبب ان اي حد يتصل بيكي بعد مواعيد العمل الرسمية بمعنى اوضح مواعيد العمل للعمل ومواعيد البيت والاسرة للبيت والاسرة واقطعى خط الرجعه مع الارجل الحقير ده نهائي ويكون ردك عليه رد حاااااااااااسم وقاطع وبمنتهى الحدة

طبعا يااوشا
لان زى ماربنا قال
اللي بينهم مودة ورحمة
ولو كل زوج وزوجة اتصارحوا مع بعض ده هيجنبهم بلاوى هم في غنى عنها

لا حول ولا قوة الا بالله
يعني دلوقتي لو مكنتيش اتنقلتي لقسم تاني
ومحدش قالك على حقيقته
ياترى كان هيبقى وضعك ايه ؟؟
ولو فضل يطاردك ياترى هتوصلي لحد فين ؟؟

انفدي بجلدك يابنتي وروحي صلي ركعتين لله
واستغفري ربك وتفاني في خدمة زوجك
علشان ربنا يغفرلك
وشيلي جوزك فوق راسك
وكفاية انك عاملاه طرطور لمدة شهور

وكفاية عليكي ذنوب لحد كده

فضفضي ياام عمر
انا معاكي وسمعاكس ياحبي
ايه اللي مضايقك